អាមេរិកផ្តល់ថវិកា៤៥លានដុល្លារជួយអនុវត្តបទឈប់បាញ់កម្ពុជា-ថៃ
កាលពីម្សិលមិញ សហរដ្ឋអាមេរិកបានប្រកាសផ្តល់ជំនួយប្រមាណ ៤៥លានដុល្លារ ខណៈខ្លួនព្យាយាមពង្រឹងបទឈប់បាញ់ដ៏ផុយស្រួយរវាងប្រទេសថៃ និងកម្ពុជា។
លោក Michael DeSombre មន្ត្រីជាន់ខ្ពស់ក្រសួងការបរទេសប្រចាំតំបន់អាស៊ីបូព៌ា កំពុងបំពេញទស្សនកិច្ចនៅប្រទេសថៃ និងកម្ពុជា ដើម្បីពិភាក្សាអំពីវិធីពង្រឹងបទឈប់បាញ់ ដែលលោកប្រធានាធិបតី Donald Trump បានព្យាយាមគូសបញ្ជាក់ជាសមិទ្ធផលមួយ។
លោក DeSombre បាននិយាយថា សហរដ្ឋអាមេរិកនឹងផ្តល់ប្រាក់ចំនួន 20 លានដុល្លារដើម្បីជួយប្រទេសទាំងពីរក្នុងការប្រយុទ្ធប្រឆាំងនឹងការជួញដូរគ្រឿងញៀន និងការបោកប្រាស់តាមប្រព័ន្ធអ៊ីនធឺណិត ដែលបានក្លាយជាកង្វល់ដ៏ធំមួយនៅក្នុងប្រទេសកម្ពុជា។
លោកក៏បាននិយាយថា សហរដ្ឋអាមេរិកនឹងផ្តល់ប្រាក់ ១៥ លានដុល្លារដើម្បីជួយដល់ប្រជាជនដែលត្រូវផ្លាស់ទីលំនៅដោយការប្រយុទ្ធគ្នានាពេលថ្មីៗនេះ ព្រមទាំង ១០ លានដុល្លារសម្រាប់ការដោះមីន។
លោក DeSombre បាននិយាយនៅក្នុងសេចក្តីថ្លែងការណ៍មួយថា “សហរដ្ឋអាមេរិកនឹងបន្តគាំទ្ររដ្ឋាភិបាលកម្ពុជា និងថៃ នៅពេលដែលពួកគេអនុវត្តកិច្ចព្រមព្រៀងសន្តិភាពទីក្រុងគូឡាឡាំពួ និងត្រួសត្រាយផ្លូវសម្រាប់ការវិលត្រឡប់ទៅរកសន្តិភាព វិបុលភាព និងស្ថិរភាពសម្រាប់ប្រជាជន និងតំបន់របស់ពួកគេ” ។
លោកបាននិយាយសំដៅទៅលើកិច្ចព្រមព្រៀងមួយដែលបានចុះហត្ថលេខារវាងប្រទេសទាំងពីរក្នុងវត្តមានរបស់លោក Trump ក្នុងអំឡុងពេលដំណើរទស្សនកិច្ចនៅក្នុងខែតុលានៅប្រទេសម៉ាឡេស៊ីដែលកាលនោះជាប្រធានប្លុកអាស៊ាន។
